Monday, September 19, 2011

ཆར་དྭངས་ཤུལ་གྱི་མཁར་རྫོང་སྐྱ་བོ།



བཏང་བ་ཡིན་ནམ་ཡང་ན་བསྐྱུར་བ་ཡིན།།

ང་ལ་ཁྱིམ་གཞིས་བོར་བའི་སྣང་བ་ཞིག།

བཤིག་པ་ཡིན་ནམ་ཡང་ན་ཞིག་པ་རེད།།

འདི་ན་སུས་ཀྱང་མི་འདོད་མཁར་རྫོང་ཞིག།

རྫོང་དེ་རྙིང་གོག་ཡིན་ཡང་ཕ་ཡུལ་རེད།།

སྤང་བོ་ཀེར་ལངས་འདྲ་བའི་རྫོང་མཁར་འདི།།

བསྐྱུར་བ་ཡིན་ན་སུ་ཡི་རྐང་འདྲེན་ཡིན།།

བསྐྱབ་པ་ཡིན་ན་སུ་ཞིག་འཁྲིད་མཁན་རེད།།

དེ་ལ་ཐུག་ན་ལག་པ་ཚ་ཤུར་ཤུར།།

དེ་ལ་གཡོལ་ན་ངོ་གདོང་གྲང་ཤུར་ཤུར།།

རྒན་པོ་གཡག་འདེད་ཅིག་གི་རེ་བ་འདྲ།།

མ་ལོ་འཐག་མཁན་ཞིག་གི་མིག་ཆུ་འདྲ།།

ལ་ཤས་སྔོན་ནས་ཡོད་པའི་ཁུར་མཁན་འདྲ།།

ཁ་ཤས་རྗེས་ནས་འོང་བའི་དཔོན་པོ་འདྲ།།

འདི་ལ་གནའ་གཏམ་ཞིག་གི་ཕྱི་ནང་ཡོད།།

གདོད་མ་ས་འདིར་ཆགས་པའི་ལུགས་ཀྱང་ཡོད།།

རླུང་བུ་འཚུབ་ཤུལ་རྡུལ་ཞིག་འཁོར་བཞིན་འདུག།

ཆར་བ་བབས་ཤུལ་ཤུགས་གླུ་ལེན་བཞིན་འདུག།

ཞེན་པ་ཆགས་སའི་རྟེན་གྱི་ལྷག་རོ་འདི།།

ཨ་མ་རྒྱལ་མའི་ཞལ་དུ་འདེབས་སམ་ཅི།།

རྡོ་ལ་བརྡབ་ཀྱང་ཆོག་མོད་ཕ་རྫས་རེད།།

ཆུ་ལ་བསྐྱུར་ཀྱང་ཆོག་མོད་གནའ་རྫས་རེད།།

མི་འདོད་ན་ཡང་ང་ཚོའི་མེས་ནོར་རེད།།

ད་ནི་གང་དགའ་གང་བྱེད་གྲོས་ཤིག་མཛོད།།

Thursday, September 1, 2011

རྨི་ལམ་ནང་གི་བུ་མོ།




རྨི་ལམ་ཞིག་གི་སྔ་གཞུག་ཏུ།

མདང་དགོང་ཐུག་པ་དེ་ནི་དོན་དངོས་ཡིན་ནམ།།
ལག་ཟུང་འཇུས་པ་དེ་ནི་མངོན་སུམ་ཡིན་ནམ།།
ཁྱེད་རང་རྨི་ལམ་ནང་ལ་ག་ལེར་འོང་ནས།།
ང་ཡི་སེམས་པ་འདི་ནས་འཐེན་འཐེན་གནང་བྱུང་།།

ང་དང་འགྲོགས་འདོད་གསུངས་བ་ཁྱེད་རང་ཡིན་སྐད།།
ཁྱོད་ལ་མཆི་སྒྲོས་སྦྱོར་མཁན་ང་རང་ཡིན་འདུག།
ལས་ཀྱི་དྲོད་ཀྱིས་བསྐྱིལ་བའི་མལ་ས་འདི་རུ།།
གཏན་དུ་འགྲོགས་སྙིང་འདོད་པའི་མི་ཞིག་འདུག་ག།

མིག་ཟུང་ཙུམ་ཐེངས་རེ་ལ་མངོན་སུམ་མཇལ་གི།
ཞལ་ངོ་ལྟ་ཐེངས་རེ་ལ་གད་མོ་བཞད་གི།
ལས་འཕྲོ་ཡོད་པས་མ་སྡུག་མ་སྡུག་གསུངས་བྱུང་།།
ཞེ་དྲག་མི་འགོར་མཇལ་ཡོང་མཇལ་ཡོང་གསུངས་བྱུང་།།

ས་ལ་ཁ་བ་བབས་ནས་ལ་རྩེ་མནན་འདུག།
ཞབས་རྗེས་གངས་ལ་བཞག་ནས་སླེབས་ན་བསམས་སོང་།།
ཡུན་ཙམ་དགོངས་པ་བཞེས་དང་ཁ་འབྲས་སྙིང་རྗེ།།
ལམ་ཙམ་བཞུགས་རོགས་མཛོད་དང་བདག་གི་འཁྲིས་སུ།།

ཁྱེད་ནི་རྨི་ལམ་ཞིག་གི་ས་བོན་ཡིན་ཟེར།།
ཁྱེད་ནི་རི་རྒྱབ་དེ་ནས་གང་འདྲ་ཡོང་ངམ།།
ཁ་བ་བརྒྱབ་པ་ཨེ་འཐུག་ཤེལ་གྱི་སྒྲོམ་བུ།།
ཁ་ཤུལ་འཁྱགས་པ་ཨེ་བྱུང་སྙིང་གི་ཚིལ་ལུ།།

རྨི་ལམ་ཞིང་འདིར་དབྱར་དགུན་སོ་ཚིས་མི་མངའ།།
ང་དང་མཇལ་ན་ཁྱོད་ལ་གྲང་ངར་མི་ཟུག།།
ཡང་ཡང་གྲུ་ཐུག་བརྒྱབ་ནས་འཁོར་ར་འགྲོ་ཡ།།
ལག་པའི་མཐིལ་ལ་རྟེན་འབྲེལ་རི་མོ་འབྲི་ཡ།1

མཆན། ༡ རྒྱ་གར་གྱི་ལུགས་སྲོལ་ལ་སྨན་ཤར་ན་གཞོན་མ་རྣམས་ཀྱི་ལག་མཐིལ་རི་མོ་འདྲ་མིན་འབྲི་བ་མ་ཟད་བརྩེ་དུང་ཆོས་ལུགས་གཉིས་ཀྱི་སྟེང་ནས་འགྲེལ་བཤད་རྒྱག་སྲོལ་འདུག

འཇིག་རྟེན་གྱི་ཉི་མ།




བདག་གི་རྨི་ལམ་སྐྱ་མདའ་མ་བཏང་སྔོན་ལ།།
ཁ་ཆར་རླུང་བུས་འཇིག་རྟེན་མ་བཅོམ་གོང་ལ།།
ཉི་མ་དེ་ནི་འཇིག་རྟེན་ཉི་མ་ཡིན་སོང་།།
དྲོད་དང་སྨོན་ལམ་འཛོམས་པའི་ཉི་མ་ཡིན་སོང་།།

ཉྀ་མ་དེ་ལ་ཉེ་རིང་ཆགས་སྡང་མི་མངའ།།
ཉི་མ་དེ་ལ་འཕེལ་འགྲིབ་འགྱུར་བ་མི་མངའ།།
བདག་གི་རྨི་ལམ་སྐྱ་མདའ་མ་བཏང་སྔོན་ལ།།
ཉི་མ་དེ་ནི་འདི་ལྟར་བོད་ལ་ཤར་སོང་།།

བདག་གི་རྨི་ལམ་སྐྱ་མདའ་བཏང་བའི་རྗེས་ལ།།
དཀར་དམར་གློག་གི་སྣང་བ་རྒོད་པའི་དུས་ལ།།
ཉི་མ་དེ་ནི་འཇིག་རྟེན་གཞན་ལ་ཤར་འདུག
འོད་ཀྱི་སྣང་བ་ཡུལ་ཕྱོགས་གཅིག་ལ་ཤར་འདུག།

ཉི་མ་དེ་ལ་བརྩེ་བའི་སེམས་པ་མི་འདུག།
ཉི་མ་དེ་ལ་རིང་བའི་ཁྲེལ་གཞུང་མི་འདུག།
བདག་གི་རྨི་ལམ་སྐྱ་མདའ་བཏང་བའི་རྗེས་ལ།།
ཉི་མ་དེ་ནི་འདི་ལྟར་ནུབ་ལ་ནུབ་སོང་།།

མེས་པོས་ཉི་མ་སེམས་ཀྱི་འོད་ཐིག་ཡིན་ཟེར།།
བདག་གི་རྨི་ལམ་སྐྱ་མདའ་བཏང་བའི་རྗེས་ལ།།
མེས་པའི་ཉི་མ་སྔོན་གྱི་དེ་འདྲ་ཡིན་ནམ།།
ནམ་ཡང་འགྱུར་བ་མེད་པའི་འོད་ཅིག་ཡིན་ནམ།།

ཕ་མས་ཉི་མ་སྐྱིད་ཀྱི་ཁྱིམ་ཞིག་ཡིན་ཟེར།།
རྨི་ལམ་སྐྱ་མདའི་སྣང་བ་བསྡུས་པའི་རྗེས་ལ།།
ཉི་མ་དེ་ནི་བརྩེ་བའི་དབྱངས་ཤིག་ཡིན་ནམ།།
གདོད་ནས་བརྩེ་བར་འཐག་པའི་དབྱངས་ཤིག་ཡིན་ནམ།།

ང་དང་ལྷ་སའི་སྒྲོལ་མའི་གཏམ་རྒྱུད།


ལྷ་སའི་སྒྲོལ་མ་ཆུ་རུ་བཞུར་སོང་།།
རིག་འཛིན་བཟང་མོ་ནུབ་དུ་ཕེབས་སོང་།།
དུར་ཁྲོད་ཁོ་བོ་ལྷོ་རུ་འཁྱམས་ཏེ།།
སེམས་ཀྱི་ཁོ་ཐག་སྔོན་ནས་ཆད་པས།།
དབེན་གནས་ཛ་ལན་དྷ་རའི་རི་ན།།
ང་ཡིས་སྙན་ངག་གླུ་རུ་བླངས་ཡོད།།

ད་ལོ་ཆར་འགོ་མ་བཙུགས་གོང་ལ།།
ནམ་མཁའ་སྔོ་ཞིང་དྭངས་པའི་ཉིན་ཞིག།
བདག་ལ་ཐག་རིང་ཐག་རིང་ཞིག་ནས།།
ཁ་པར་འབྱོར་བའི་དྲིལ་བརྡ་དཀྲོལ་སོང་།།
ཁྱོད་བདེ་འཚམས་འདྲི་མ་ཞུས་གོང་ལ།།
ང་སྡུག་ཅེས་ཟེར་ངུ་སྐད་བརྒྱབ་བྱུང་།།

རྒྱུས་ཡོད་སྐད་ལ་བསམ་བློ་བཏང་ན།།
ལྷ་སའི་ཁྲོམ་གྱི་སྒྲོལ་མ་ཡིན་འདུག།
ཡབ་ཡུམ་དབང་ཐང་བཙན་པས་ལན་ཟེར།།
རང་ལ་རང་དབང་མེད་པས་སྐྱོ་ཟེར།།
ལྷ་སའི་ཁྲོམ་གྱི་རྒྱུ་ཆེན་དེ་ལ།།
འགྲོ་འདོད་མེད་ཀྱང་བྱིན་ལུགས་གསུངས་བྱུང་།།

སྐྱོ་ཞིང་སྨུག་པ་འཐིབ་ཀྱིན་འོང་འདྲའི།།
སེམས་པ་དྲན་པས་ནང་དུ་བཀུགས་ཏེ།།
ཆུང་རོགས་སྒྲོལ་མའི་སེམས་ལ་འཚམས་པའི།།
ཚིག་གསུམ་མདུད་པ་ཡང་བསྐྱར་བཤིག་ཡོད།།
སྔོན་ལས་གར་ཡོད་རང་དབང་མེད་པས།།
ཧ་ཅང་སྐྱོ་བ་མ་བྱེད་ལབ་ཡོད།།

དྲན་དང་སྡུག་གི་བར་ཐག་གླེང་ནས།།
མཚན་གྱི་ཆུ་ཚོད་དགུ་བར་སླེབས་སོང་།།
མ་ཆོད་ངུ་སྐད་དལ་དལ་ལྷོད་ལྷོད།།
ལྷ་སའི་གཙང་བོའི་ནང་ལ་འདྲེས་ཐལ།།
སྐབས་དེར་སྟོང་ཞིང་ཤོར་བའི་སྣང་བ།།
ཡུལ་དང་འབྲལ་དུས་ལས་ཀྱུང་སྡུག་པ།།

སྔོན་ནས་བཅད་པའི་ཅེ་ནེ་ཁ་ནེ།།
དེ་རིང་མ་སྲོན་ཡང་བསྐྱར་ཟོས་པས།།
སྐྱོ་བའི་སྒང་ལ་སྐྱོ་བ་བསྣན་ཏེ།།
རྐང་པས་གཟུགས་པོ་ཁྱོགས་པ་མ་བྱུང་།།
མལ་སའི་ནང་ལ་ལྷེམ་སེ་ལྷུང་ཐལ།།
ལྡབ་ལྡིབ་ཁྲོད་དུ་ཡོད་ཚད་འཐིམ་ཐལ།།

ཞོགས་པ་ཡིན་བསམ་ཡར་ལ་ལངས་དུས།།
ཉིན་གུང་ཆུ་ཚོད་བཅུ་གཅིག་ལྷག་རེད།།
ཁ་ནང་གཙང་མ་མ་ཁྲུས་གོང་ལ།།
ཁ་པར་དྲིལ་བརྡ་སིར་སིར་གྲགས་སོང་།།
ཁ་པར་མི་འཇོག་རྒྱུ་མཚན་ཤོད་ཟེར།།
ག་ཚོད་བཏང་འདུག་རང་གིས་ལྟོས་ཟེར།།

འདི་ནི་ང་ཡི་གྲོགས་མོ་ཞིག་སྟེ།།
གཞན་གྱིས་དགའ་རོགས་རེད་ཅེས་གླེང་བའི།།
ཁམས་ཀྱི་རིག་འཛིན་བཟང་མོ་ཡིན་ནོ།།
ད་དུང་ལས་ཀྱི་འབྲེལ་བ་བྱུང་མེད།།
སྙིང་གཏམ་ཏོག་ཙམ་བཤད་བཞིན་ཡོད་མོད།།
ལས་འཕྲོ་ཡོད་མེད་ད་དུང་མི་ཤེས།།

ནང་ན་ཡོད་ན་ཡོང་གི་ཡིན་ཟེར།།
ཤ་དང་ཚལ་རིགས་ཉོ་ཡོང་ཟེར་གི།
མདང་ནུབ་སེམས་པ་མ་སྐྱིད་ཚུལ་དང་།།
རླངས་ཐབ་སྔོན་ནས་རྫོགས་རབས་བཤད་དེ།།
བདེ་ལེགས་ཟ་ཁང་ཡང་ཐོག་དེ་རུ།།
ཉིན་གུང་འཕྲད་པའི་ཁ་ཆད་བགོས་སོ།།


ཁམས་ཀྱི་བྲག་གཡབ་སྐྱིད་ཚུལ་ནས་བཟུང་།།
ཇོ་ཇོ་ཕྱི་རྒྱལ་ཡོད་པའི་བར་དུ།།
རིག་འཛིན་བཟང་མོས་ལན་གཅིག་བཤད་པས།།
ཕྱི་དྲོ་ཆུ་ཚོད་དྲུག་པར་ཟིན་འདུག།
རྗེས་མར་འབྲེལ་བ་མང་ཙམ་བྱོས་དང་།།
མཉམ་དུ་ནུབ་ལ་འགྲོ་ཆོག་ཟེར་གི།།


མཚན་དཀྱིལ་རང་ཤག་འཁྱག་པའི་ནང་དུ།།
ལས་ཀྱི་འགྱུར་བ་བསམ་བློ་བཏང་སྟེ།།
སྔོན་ནས་ད་ལྟའི་བྱུང་རབས་ཁག་ཅིག།
ནག་ཁུང་ནང་ནས་ལམ་ལམ་འཆར་གི།
ཕྱི་ལ་ཆར་བ་བརྒྱབ་པ་ནང་བཞིན།།
ནང་ལ་སྐྱོ་བ་དེ་འདྲ་ཆེ་སོང་།།

ད་ལོ་ཆར་མཇུག་མ་རྫོགས་སྔོན་ལ།།
རིག་འཛིན་ནུབ་ཕྱོགས་གླིང་ལ་འཕུར་སོང་།།
མི་རྐྱང་ཁྱོད་ལ་ཐུག་པའི་ཆེད་དུ།།
ཁ་པར་ཐེངས་མང་བཏང་ཡོད་གསུངས་བྱུང་།།
མ་སོང་སྔ་ཉིན་ཁྱེད་ཀྱི་སྒོ་རུ།།
ཆུ་ཚོད་བཞི་ལ་བསྒུགས་ཡིན་གསུངས་བྱུང་།།


ནུབ་ཕྱོགས་གླིང་གི་ཁ་པར་འདི་ཡིས།།
ང་ལ་ཚོར་བ་གང་འཚམས་སྤྲད་བྱུང་།།
དེ་རིང་ཞོགས་པ་སྔ་པོ་ལངས་ནས།།
གཙུག་ལག་ཁང་དུ་མྱུར་མོར་སོང་སྟེ།།
ང་དང་རིག་འཛིན་སྒྲོལ་མའི་བསམ་དོན།།
འགྲུབ་པར་བར་ཆད་མེད་པ་ཞུས་ཡོད།།
མཆན། ༡ཅེ་ནེ་ཁ་ནེ་རྒྱ་གར་གྱི་མྱོས་རྫས་ཤིག་སྟེ། ཐ་མག་དང་འདྲ་བར་བཟི་ཁ་ཅན་ཞིག་ཡིན་ནོ།

འུ་ཚོ་ནི་ཉི་འོད་འཐུང་བའི་བྱ་ཁྱུ་ཞིག་ཡིན་པ་བདེན་ན

འུ་ཚོ་ནི་ཉི་འོད་འཐུང་བའི་བྱ་ཁྱུ་ཞིག་ཡིན་པ་བདེན་ན
འུ་ཚོས་ཁོད་ཡངས་བའི་འཇིག་རྟེན་ཞིག་གི་སྒོ་གླེགས་རྡུང་བཞིན

སྤྱི་ཟླ་གསུམ་པ་གླེང་བ།

སྤྱི་ཟླ་གསུམ་པ་གླེང་བ།
ལས་དབང་ལྟ་བུའི་བཙན་རྫོང་མཐུག་པོ་དག་ཀྱང

མཐའ་མི་མངོན་པའི་ནམ་ནཁའ།

མཐའ་མི་མངོན་པའི་ནམ་ནཁའ།
དྲན།

མཐའ་མི་མངོན་པའི་ནམ་ནཁའ།

མཐའ་མི་མངོན་པའི་ནམ་ནཁའ།

མཐའ་མི་མངོན་པའི་ནམ་ནཁའ།

མཐའ་མི་མངོན་པའི་ནམ་ནཁའ།

su and you

su and you

xia xue de shi huo

hena and Dhurtol

hena and Dhurtol

go

wo zi xia xue zhong

wo zi xia xue zhong

balak

balak

kunsang

kunsang

my home

my home